巴塞竟兩年來喺西甲都無被罰過12碼？

文：MenClub 波特先生　　圖：互聯網
POSTED ON 31 Jan 2018


巴塞隆拿可以話係今季歐洲表現最好嘅球隊之一，佢地喺西甲以18勝3和不敗嘅戰績暫排名聯賽第一位，領先第二位嘅馬體會11分之多。而喺岩岩嘅西甲聯賽入面，巴塞又以2：1擊敗接近降班區嘅艾拉維斯，但係佢地因為一次手球無被罰12碼引黎一輪熱話。

對於唔係巴塞嘅支持者，相信有唔少人都曾經指巴塞獲得球證嘅看顧(又或指黑哨)，而面對艾拉維斯佢地再一次逃過12碼，實在令唔少人感到難以置信。

(留意影片1:33:37）

自2016年2月14日面對切爾達時輸嘅12碼之後，巴塞已經連續74場西甲賽事無被吹罰過12碼，而要知道呢個期間巴塞一共獲得32次主罰12碼嘅機會。另外，西甲喺呢個接近2年嘅期間，一共罰左219個12碼，但係就無一次係罰巴塞的。

當然，你可以話巴塞嘅防守出色，無任何出錯嘅餘地令佢地要輸12碼，但係咁極端嘅情況卻真係好唔尋常，就好似呢個咁明顯嘅手球球證都睇唔到，真係好難說得過去。不過雖然係咁，巴塞上季都錯失左聯賽冠軍，所以就算無被判罰12碼，亦唔代表冠軍可以袋袋平安的。