【曱甴～！】阿富汗李小龍進軍荷里活延續傳奇！

文：MenClub 波特先生　　圖：互聯網
POSTED ON 02 Feb 2018

講起中國功夫相信唔少人第一時間諗到嘅都係已故武打巨星李小龍，佢自創嘅截拳道目前喺世界各地都有門生，其中喺外國就更加係廣受歡迎。由於李小龍已經離世多年，所以大家要想睇到佢嘅風采就只可以透過舊時嘅影片或電影，不過近期卻有消息指李小龍出現喺阿富汗，呢個消息究竟係咩解呢？

原來一位黎自阿富汗名叫阿巴斯（Abbas Alizadeh）嘅李小龍Fans，自小就接受訓練練就一身勁爆肌肉，並學習使用雙截棍，再加上剪左一個同李小龍一樣嘅髮型，所以成個外型就同李小龍有9成相似，並被人稱為「阿富汗李小龍」！

據了解，原來阿巴斯自8、9歲開始接觸李小龍嘅電影後就愛上佢嘅功夫，但由於屋企無錢所以佢只能夠自學，並自製各種鍛練用嘅器材，所以佢宜家呢一身嘅肌肉都係靠佢自己一手打造出黎的。


而由於外型好似李小龍，所以被電影公司睇中，目前佢已經拍左兩套電影，其中一部為阿塞拜疆電影《兄弟李》，而另一套則係印度電影，兩套電影佢都係做李小龍一角。

雖然有人認為阿巴斯唔可能完全等同李小龍，但係能夠咁傳神重現呢位傳奇人物，實在要好好珍惜。