【冬季奧運】美國無舵雪橇女將Emily高速下發生意外

文：MenClub 波特先生　　圖：互聯網
POSTED ON 14 Feb 2018


目前冬季奧運各個項目都進行得如火如荼，而唔少金牌亦相繼產生，其中女子單人無舵雪橇尋日亦展開決賽決出冠亞季軍誰屬。不過，就喺比賽最後決賽一Round，美國代表24歲嘅Emily Sweeney卻不幸喺比賽途中發生意外受傷。


無舵雪橇就係運動員需要敞平喺雪橇上，其後進入賽道運用微細嘅身體動作去控制雪橇左右移動，由於加速後雪橇嘅速度係極高的，所以運動員任何細微嘅失誤都會嚴重影響其自身嘅滑行軌道。



而今次Emily就喺出發後接近3分鐘嘅時候，明顯見到佢嘅雪橇並唔係以正線移動，其後開始轉彎嘅時候更嚴重失控，導致連人帶雪橇喺賽道上左右亂拋，甚至一度撞向賽道兩旁嘅廣告板，最終Emily更被撞至跌出雪橇先正式停落黎。

停落黎後，Emily並未有即時企起身離開，佢扒喺地方一段時間先可以離開賽道，雖然佢係可以獨自離開，但係賽後經檢查後亦發現佢身上多處地方有瘀傷，明顯係因為失控撞上賽道兩旁下而導致的。

今次Emily嘅意外雖然令佢有唔少地方受傷，但都唔算非常嚴重嘅一次意外，但係可以睇到其實呢類型嘅運動由於速度極高，所以當發生意外時好可能會帶黎嚴重嘅傷害，希望今季賽事唔好再發生呢類型嘅意外就好了。