【最老入球者】三浦知良獲健力士世界紀錄確認！

文：MenClub 波特先生　　圖：互聯網
POSTED ON 23 Feb 2018

日本著名足球員三浦知良，對於唔少球迷黎講都係神級人物，因為如今已經年過半百，但係佢仍然無退落黎，繼續喺日本聯賽發光發熱，完全係真正愛足球嘅典範。

本月26日，三浦將迎來自己51歲嘅生日，而佢目前仍然喺日本乙組聯賽球隊橫濱FC效力，退休之日好似仍然遙遙無期。而唔好睇三浦已經50歲，佢喺球場上仍然係對方嘅一大威脅，就好似佢上季雖然上陣次數已經大大減少，但仍以50歲之齡取得入球，實在令人敬佩。

而日前三浦正式獲健力士世界紀錄大全確認，成為最年長取得職業聯賽入球嘅足球員，紀錄為50歲零14日。當時是去年3月12日，對手為群馬草溫泉，三浦喺40分鐘取得入球，而呢個入球亦助球隊以1：0小勝對手。三浦創下嘅呢個紀錄，相信之後要想打破都真係絕對唔容易。


三浦自2005年加盟橫濱FC之後，一直都效力呢支球隊，只係期間曾被短暫外借至雪梨FC。而整個職業生涯，三浦曾效力多支球隊，而總入球數超過180球，係日本足球史上最出色嘅足球員之一。