【Nike四億串聯，皇馬將收購尼馬？】

文：MenClub 波特先生　　圖：互聯網
POSTED ON 15 Mar 2018

去年夏天，尼馬以天價2.2億歐元從巴塞隆拿加盟法甲班霸巴黎聖日耳門，而被外界評為美斯及C朗之後嘅世界第三人，尼馬喺聖日耳門可以話皇帝一般嘅存在。雖然喺歐聯被皇馬踢出局，但國內嘅聯賽喺尼馬嘅帶領下以巨大嘅差距佔據住榜首。

不過，如果尼馬繼續留喺聖日耳門，佢要成為世界第一足球員又或再次奪得歐聯嘅機會睇黎都較為低。因此，尼馬嘅爸爸，亦即係佢嘅經理人有意將佢再次帶返四大聯賽，而首選就係巴塞嘅宿敵皇馬。此前有消息指，尼馬爸爸向皇馬要求4億歐元嘅轉會費，好明顯皇馬暫時無呢個意思。

不過對於尼馬爸爸嘅意圖，著名體育品牌Nike有意介入，佢地亦都好想可以協助尼馬從PSG加盟皇馬，因為咁樣對於佢地品牌有住戰略性嘅作用。尼馬係繼皇馬頭牌球星C朗拿度後，Nike嘅第二代言人，如果佢地能夠效力同一支球隊就可以抗衡作為adidas首席代言人嘅美斯。

另外，尼馬現年只有26歲，如果佢加盟皇馬，相信未來會有好大機會接C朗班成為球隊嘅核心。再加上皇馬一眾年輕骨幹同傳奇球員施丹作為教練，尼馬將有機會以更好嘅戰績去挑戰金球獎。

而目前，皇馬與adidas有合同在身，雙方嘅合同將到2020年到期，期間皇馬每年能夠獲得4000萬歐元嘅贊助費。不過，由於4000萬歐元嘅贊助費喺今時今日嘅球圈屬於非常低廉嘅價格，因此adidas已經同皇馬展開新一輪合同嘅談判。據消息指，adidas願意為皇馬開出一份10年每年贊助費達到1億歐元嘅合同，不過皇馬方面已經拒絕。

以皇馬近幾季嘅表現，佢地絕對有更高嘅議價能力，要知道巴塞隆拿目前同Nike嘅合同，每年就能夠獲得1.05億歐元，而皇馬近4季三奪歐聯冠軍，論球隊品牌價值絕對要比巴塞更高，所以相信Nike為皇馬開出嘅合同絕對唔會比巴塞少，咁樣憑住呢份巨額贊助費皇馬絕對有能力出資收購尼馬。而根據以往嘅做法，皇馬可以提前同adidas終止合同，但就要賠償違約金比對方。