【恐嚇？】希臘球隊主席竟陀槍入場搵球證理論？！

文：MenClub 波特先生　　圖：互聯網
POSTED ON 16 Mar 2018

喺足球比賽入面，球證係場上最大嘅話事人，任何球員、任何人士都必須接受球證嘅一切判決，如果有任何挑戰球證或恐嚇球證嘅情況，足總方面都一定唔會輕易放過，甚至嚴加處罰。不過，日前一場希臘超級聯賽就發生一宗駭人事件，嚴重挑戰球證嘅絕對地位。

目前，希超榜首位置可以話非常緊湊，因為榜首三支球隊處於只有1-2分嘅差距，每一場比賽嘅勝負都非常重要。而咁岩近日前三其中兩支球隊AEK雅典就對上PAOK，雙方戰至89分鐘都仲係0:0平手，但就係呢個時候PAOK憑住角球成功以頭搥破門，1:0看似全取3分登頂在望。

點知，AEK球員向球證理論，經與旁證商討後決定改判呢個入球越位在先，所以雙方繼續維持0:0嘅情況。對於球證改判，PAOK球員當然唔肯過佢，但係最唔滿意嘅並唔係球員，而係PAOK嘅主席Ivan Savvidis。

Savvidis得知球證改判後，立刻火氣衝入球場搵球證理論，而其身旁嘅保鑣亦數次捉住佢，希望佢可以保持冷靜。而有現場攝影師拍到，當時嘅Savvidis原來腰間有一把手槍，雖然佢無意圖掹槍，但係明顯對球證構成威脅，最終賽事被迫腰斬。