【把握力分野】美斯兩次射破大細龍門，巴塞3:0完勝車仔！

文：MenClub 波特先生　　圖：互聯網
POSTED ON 15 Mar 2018


全場比賽精華尋晚係歐聯16強次回合最後一個比賽日，焦點比賽當然就係巴塞隆拿主場迎戰車路士。首回合雙方踢成1:1平手，巴塞手握1個作客入球優勢已經比睇高一線，今仗回到主場更加係以勝利為目標。

主隊巴塞今仗排出4-4-2陣式應戰，其中美斯同蘇亞雷斯作為箭頭掛帥，而車路士方面則以3-4-3出戰，希望憑住兩翼夏薩特同韋利安去挪破對手防線。

開賽3分鐘，巴塞襯車路士未站穩陣腳，喺進攻端右邊發難，最終球落喺切入嘅美斯腳下，雖然當刻佢已經非常接近底線，射門嘅角度已經非常小，但係佢竟然用右腳腳內檔射波，最終球穿過車路士門將高圖爾斯嘅大細龍門，巴塞1:0領先！
First chance through and Leo Messi has bagged a goal. GOAT. pic.twitter.com/ssJkSQqFxO — Rami (@GoonerRami) March 14, 2018
然後車路士雖然搶番唔少球權，並不斷發動攻勢，但始終未能威脅到巴塞嘅大門。而戰至20分鐘，巴塞憑住一次反擊，左路嘅美斯將球分到右邊處於空位嘅迪比利，呢位小將控一下個波之後右腳勁射，雖然高圖爾斯拍到下個波，但由於個波太勁都係應聲入網，巴塞2:0擴大領先優勢。
DEMBELE GOAL. pic.twitter.com/DgL6LYqBnD — Messiatico™ (@Messiatico) March 14, 2018
呢個時候車路士要贏只可以攻入2球，但明顯巴塞無比太多機會佢地。唯獨一次最接近入球嘅，就係馬高斯阿朗素嘅罰球擊中門柱，否則車路士都仲有一線生機。另外，下半場48分鐘基奧特喺禁區內疑似被碧基拉跌，但球證唔單只無比12碼，仲罰左基奧特一張黃牌。對此車路士領隊干地喺場邊激到生蝦咁跳。
Messi’s Goal pic.twitter.com/RhLJ7JAIfy — (@10Lawrence_) March 14, 2018
就喺遲遲未能追番一球之際，美斯喺63分鐘再下一城，佢喺禁區左邊起腳，再一次射穿高圖爾斯大細龍門，佢嘅梅開二度令巴塞3:0取得絕對優勢。
Two nutmeg goals. One from each side. Simply Messi pic.twitter.com/4ZS0dSYMcf — Leo Messi (@messi10stats) March 14, 2018
美斯入左呢球之後，車路士明顯已經再無任何機會，最終比賽以3:0結束，兩回合計巴塞以4:1大勝車路士，晉身八強。

不過睇番數據，其實車路士並唔係差巴塞好多，其中控球率巴塞為53％，而車路士則係47%；射門機會巴塞有8次，其中7次中龍，而車仔則9次射門得3次中龍。所以可以睇得出，最大嘅分野其實係雙方嘅把握力，呢一點相信干地未來需要諗下點樣改善了。