【叫佢睇Slam Dunk啦！】台灣國小比賽為避強敵主動尋敗？！

文：MenClub 波特先生　　圖：互聯網
POSTED ON 16 Mar 2018


作為運動比賽，理論上每一位運動員都係為左勝利而戰的，不過呢啲都係理論上，因為實際上有唔少處境都有尋求落敗嘅時候，其中好似NBA為左獲得更高順位選秀權嘅機會，佢地都會擺爛，亦即係唔想贏波，另外部份受賄賂嘅球員亦都可能為利益而蓄意輸波。

而近日，台灣就有國小比賽出現非常難看嘅主動尋敗嘅情況，實在難以想像較早前台灣非常火熱嘅高中籃球聯賽HBL對落就有難以接受嘅運動黑暗面。

講番呢場比賽，雙方球隊場上嘅表現都明顯唔係為左贏波，佢地進攻嘅意慾極低，更多時候只係不斷傳球，直到進攻時間完結，又或蓄意進攻3秒違例，甚至有球員入球竟被教練大聲責罵。到最後時刻，領先一方的教練竟然叫自己球員攻擊自籃框，但由於其上籃未能命中，最終都係唔小心贏左波。

出現兩邊都唔想贏球嘅比賽，原來原因係為左走線，因為呢場波贏波嘅一方將會對上上屆冠軍，所以雙方教練都為左逃避強敵而喺場上不擇手段地尋求落敗。

對於呢個情況，可以話同理想中嘅比賽完全走向極端，對於一班咁細個嘅球員就灌輸呢種歪曲嘅思想，實在令人難以認同，雖然面對上屆冠軍落敗的機會真係好大，但係期間教授球員如何面對、甚至想出奇謀克敵才是應該要行嘅路。

我建議雙方教練都應該要睇下《男兒當入樽》最後湘北面對上屆冠軍山王工業嘅故事，面對難以擊敗嘅超強敵，湘北嘅球員都無驚，到後黎即使落後超過20分都無放棄，年輕嘅球員就係需要呢種熱血，去挑戰貌似不能挑戰嘅對手，咁樣先無悔！