【輕鬆輾壓】「格鬥狂人」徐曉冬KO詠春師傅！

文：MenClub 波特先生　　圖：互聯網
POSTED ON 20 Mar 2018


「我要打10個！」相信呢句對白唔少人都應該聽過，睇見「宇宙最強」甄子丹扮演嘅葉問所使用嘅詠春，可能個個都被佢極快嘅出拳所吸引。不過，實際上詠春係咪又真係咁好打呢？呢一層可能真係要打過至知！

作為傳統武術「打假專員」嘅「格鬥狂人」徐曉冬，雖然近期好似因為某啲原因而低調左好多，但佢並無完全消失，近日更同一名詠春師傅丁浩扛上，雙方喺各大傳媒面前進行左一場不准踢下陰、挖眼、打後腦嘅格鬥對決，究竟結果係點呢？

比賽一開始，丁浩師傅率先搶攻，一輪「甄子丹式」嘅連續快拳擊中徐曉冬嘅頭部，但係呢位「格鬥狂人」竟然唔防避任丁浩嘅拳擊中自己，但佢就好似若無其事咁擰一擰頭就轉為攻擊模式，不斷揮拳打中丁浩師傅嘅頭部，並且將佢拋落地。

之後雙方繼續搏拳，但係丁浩師傅由於身型較單薄，所以明顯處於下風，其後徐曉冬亦將對方打至流鼻血。就喺丁浩抹緊鼻血嘅時候，徐曉冬非常得得戚咁擺pose比記者們影相。最後，徐曉冬再憑住強勁嘅攻擊，並捉住對方件衫單手以下勾拳擊打丁浩嘅頭部，就係咁佢被打至倒地，裁判亦因此宣佈比賽暫停，大會主持亦宣佈徐曉冬取得勝利！不過後來裁判宣佈賽果嘅時候，竟然舉起雙方嘅手，表示比賽打和！

可以睇到呢場比賽徐曉冬實力上完全可以用輾壓黎形容，根本丁浩嘅攻擊完全無效，而原因之一係雙方嘅磅數差太遠。不過講到呢場比賽最搶鏡並唔係勝方徐曉冬，亦都唔係負方丁浩，而係比賽裁判，呢位裁判多次飛身分開對方，其投入程度令人睇見佢眼中個團火，實在令人英敬佩！