香港終於有自己嘅高質科幻片《明日戰記》先導預告

文：MenClub 魏文青　　
POSTED ON 21 Mar 2018

古天樂早前連奪亞洲電影大獎及香港導演會年度大獎嘅最佳男主角，24小時內成為雙料影帝，風頭都可謂一時無兩。而除咗幕前演出，佢創立嘅「天下一電影」亦於影視博覽中公佈旗下多部製作中嘅電影，包括原班人馬翻拍嘅《尋秦記》、張家輝自導自演嘅《低壓糟》、姜皓民飾演變性人的《翠絲》等等。但要數到最搶眼嘅，就一定係古天樂、劉青雲、姜皓文等人主演，以未來香港為背景嘅科幻動作電影《明日戰記》。睇完近日公佈嘅先導預告，真係會令人大叫「香港終於有自己嘅(高質)科幻電影啦！」

《明日戰記》以2055年受到外星生物「潘朵拉」入侵嘅香港為背景，古天樂及劉青雲飾演嘅角色就要穿著重型裝甲對抗外星生物。預告中所見有各種大型運輸機、戰車出現，其中公路追逐及運輸機墜毀嘅畫面亦見到逼真CG，絕對係令人驚喜之作。電影耗資4億港元、用咗三年時間籌備，再用18個月後期製作。除咗三位主角，仲有張家輝、劉嘉玲兩位影帝影后級人馬。預計2019年上映，到時真係點都要入場支持下。