【失世界第一】費達拿爆大冷出局，兼宣佈不參加泥地賽！

文：MenClub 波特先生　　圖：互聯網
POSTED ON 27 Mar 2018


「瑞士天王」費達拿進入2018年後可以話接近打出無敵嘅表現，佢成功衛冕澳洲網球公開賽，係其生涯第20個大滿貫錦標。同時，因為拿度因傷退出多項賽事，令費達拿積分上成功超過呢位宿敵，從而相隔5年半後再一次登上世界男單第一寶座。

不過，喺較早前嘅印第安威爾斯賽入面，雖然費達拿再一次打入決賽，但卻不敵迪普祖，令佢2018年嘅不敗金身被打破。而之後黎到正在舉行嘅邁阿密網球大師賽，費達拿喺首輪輪空後，第一場面對世界排名175嘅21歲澳洲小將Thanasi Kokkinakis，竟然爆大冷以盤數1:2被淘汰。

賽前，費達拿與Kokkinakis從未交鋒過，而後者就更加未喺大賽上打出過好成績，所以基本上都無人會認為費達拿會喺呢個位置出局。要知道能夠以世界排名175去擊敗世界第一係幾咁罕見嘅事，對上一次有世界排名175或以下嘅選手去擊敗世界一哥已經係2003年嘅事！

提早出局嘅費達拿由於失落唔少分數，因此其最新嘅世界排名下跌至第2位，拿度則再次登上一哥寶座。

而另一個重要嘅消息係，費達拿賽後宣佈，佢將會跳過今年嘅所有泥地賽事，亦即係話佢將再一次缺席法國網球公開賽。有咁嘅決定，係因為費達拿想搞清楚自己嘅狀態，佢需要作出調整，因為今次係佢自2014年以來首次出現連敗兩場嘅情況(先輸比迪普祖，後輸比Kokkinakis)。