【超越常理！】「字母哥」親承6步可跨越全場！！

文：MenClub 波特先生　　圖：互聯網
POSTED ON 28 Mar 2018

公鹿球星「字母哥」Giannis Antetokounmpo可以說是現今NBA最出色的球員之一，佢擁有令人難以置信嘅身體質素，同時兼具由1號位打到5號位嘅全面身手。而日前「字母哥」接受訪問期間，親口回應了一條關於自己身體質素究竟有幾變態嘅問題，就係佢原來跨越全場就只需要6步，係6步呀！

現年只有23歲嘅「字母哥」，身高6呎11吋，體重222磅，除左身高手長之外，其手掌更係令Kobe Bryant都羨慕嘅巨掌。

作為擁有變態級別身體質素嘅球員，「字母哥」喺場上總係做出令人難以置信嘅動作，好似較早前就試過跳過Tim Hardaway Jr.完成入樽，另外又曾被Carmelo Anthony晃倒後立刻轉身完成驚人封阻。


而日前「字母哥」接受訪問時，主持人問佢如果要跨越全場其實需要幾多步？「字母哥」回應:「6步。」其後主持人又問，如果由罰球線計呢？「字母哥」表示:：「一步，或者唔需要，因為我認為自己可以從罰球線起跳。」

上季，「字母哥」迎來了自己生涯首次入選全明星賽，並且首次入選已經係正選身份，而黎到今年佢嘅表現進一步提升，除左再次成為全明星賽正選外，其個人數據亦升至生涯新高27.3分10籃板4.8助攻1.5抄截1.4封阻。雖然今季常規賽MVP基本上都已經歸到火箭嘅James Harden手上，但係「字母哥」嘅表現絕對係聯盟前五的。