【2億歐元】歐洲最搶手球員沙拿將引爆豪門爭奪戰！

文：MenClub 波特先生　　圖：互聯網
POSTED ON 10 Apr 2018

如果要數今季目前最火爆嘅球員，相信C朗拿度同美斯都係排名前兩位嘅球員。不過，除左呢兩位黎自外星嘅球員之外，今季歐洲聯賽當中表現最出色嘅球員，相信就必定要數利物浦翼鋒沙拿！

現年25歲嘅沙拿，今季加盟利物浦後可以話大放異彩，表現遠超人們預期，至今佢已經喺大大小小嘅賽事入面一共為球隊攻入38球，並且交出13次助攻。沙拿攻入38個入球，係除左C朗(40球)及美斯(39球)後，喺歐洲四大聯賽入面入球最多嘅球員，可想而知佢嘅表現係有幾癲！

交出咁震撼嘅表現，沙拿又點會唔引黎歐洲各大豪門嘅注意呢？據報導指，巴黎聖日耳門已經對沙拿虎視眈眈，佢地希望可以將佢帶入球隊嘅進攻三叉戟入面，當然呢個決定就會犧牲球隊目前嘅球員，而呢個人就係前鋒卡雲尼。

對於引入沙拿，消息指聖日耳門方面已經表態願意將身價達7000萬鎊嘅卡雲尼賣走。不過，其實卡雲尼今季嘅狀態一啲都唔差，喺41場比賽入面攻入35球，雖然仍然有空位射唔入嘅時候，但效率都算唔錯。值得一提嘅係，卡雲尼較早前已經超越左伊巴謙莫域，成為聖日耳門隊史嘅得分王。

如果最終聖日耳門真係賣走卡雲尼，同時成功引入沙拿嘅話，佢地將會把麥巴比移入中路成為正箭頭，然後尼馬踢左翼，沙拿則踢右翼。

當然，聖日耳門唔係無對手的，皇馬亦對沙拿充滿興趣，2億歐元佢地亦都願意付出的。如果真係咁，沙拿將成為利物浦隊史離隊身價最高嘅球員。