籃球可以話係世界最受歡迎嘅運動之一，而NBA則係籃球世界入面最高水平嘅聯賽，入面嘅球員擁有無與倫比嘅天賦，粒粒皆星。不過，近年由於聯盟方面偏重進攻，所以特別照顧球員嘅進攻，做成防守者難以防守，又或實在太容易犯規。

為左令進攻球員更加得心應手，聯盟將以往准許嘅Hand checking防守禁止起來，而黎到今時今日情況更加變本加厲，防守者基本上摸到進攻球員條毛都會被吹犯規，甚至有時候連人都無掂到都會被吹罰犯規，結果做成身體對抗嘅情況變得少之又少。

面對聯盟希望以更多嘅進攻黎吸引球迷嘅諗法，以上嘅做法係無可厚非，但係事實上咁樣一味專注進攻，忽略防守真係對籃球或NBA好嗎？

作為湖人傳奇球星，Kobe Bryant日前就開腔批評NBA，認為只看進攻而忽略防守完全係令人難以接受的。Kobe表示，如果佢可以修改NBA規例，佢第一樣要改嘅就係增加球場上嘅身體對抗，例如重新准許Hand checking或類似嘅規則，因為佢覺得宜家歐洲嘅籃球都比NBA更具身體對抗。

Kobe補充，佢追求嘅唔係好似以往活塞嘅暴力防守，佢只係想搵番正常嘅防守，而唔係好似宜家掂到條毛都被人吹犯規。

Kobe覺得有適當嘅身體對抗會令比賽變得更具觀賞性，而球員們面對更強嘅防守，就會去提升自己嘅技術，因為你要喺面對Hand checking嘅情況下擺脫防守球員，咁樣整個聯盟嘅水平就會因此而提高！

確實，如今嘅NBA不斷被外界批評太軟，完全有別以往講求力量嘅NBA，雖然明白NBA方面想保護進攻球員，但係卻好似有啲保護得過左火，令球迷們開始反感。作為NBA總裁，Adam Silver相信聽到呢啲聲音都唔會坐以待斃，可能好快NBA就會再次有番Hand checking呢條例啦！