【無人想你？】伊巴謙莫域想踢世界盃只係一廂情願？

文：MenClub 波特先生　　圖：互聯網
POSTED ON 20 Apr 2018

世界盃仲有兩個月就到，而「呂布」伊巴謙莫域日前就公開表示有意重返瑞典國家隊，雖然佢已經36歲，但係仍然係世界最頂級嘅前鋒之一。不過，唔好以為所有人都歡迎伊巴謙莫域回歸國家隊，佢嘅加入可能會打破瑞典隊打入世界盃一路以黎嘅化學作用。

2016年6月，當瑞典國家隊完成歐國盃最後一場賽事後，伊巴謙莫域就正式宣佈退出國家隊。之後，呢位「瑞共神塔」喺球會仍然有唔錯嘅表現，其中喺2016-17球季效力曼聯期間攻入28球，成為「紅魔鬼」當季嘅神射手。可惜嘅係，臨近季尾呢位射手不幸出現嚴重受傷，導致佢之後需要休戰一段長時間。

經歷左一段長時間嘅復元，伊巴謙莫域成功回歸球場，但明顯未能找回狀態及應有表現，最終曼聯決定同佢解約，而伊巴謙莫域隨即就轉戰美職聯嘅洛彬磯銀河繼續球員生涯，其剛加盟嘅表現已經震驚當地。可能因為成功搵番應有狀態，伊巴謙莫域較早前就揚言自己想踢世界盃，並且佢自己認為只要佢想踢，佢就一定可以踢得到。不過，事實又係咪咁呢？

確實，伊巴謙莫域係目前瑞典最強嘅前鋒人選，不過喺缺少伊巴謙莫域期間，瑞典憑住團體足球，同心協力下成功淘汰意大利，獲得世界盃嘅入場券。呢班打入世界盃嘅瑞典球員，現時雄心壯志，但如果加入伊巴謙莫域，球隊必定會為左佢改變戰術及陣式，球隊原來嘅平衡及良好化學作用好大機會失去。

作為瑞典隊後備門將嘅Karl-Johan Johnsson就表示：「瑞典團現在係一個團隊，但係伊巴謙莫域係一個個人主義者，佢需要球隊完全圍繞住佢黎踢，但我地現在踢嘅更多係團隊足球。」

「當你陣中有伊巴謙奠域、C朗拿度或美斯咁嘅球員時，球隊會有一種唔同嘅打法，因為佢杜係世界級球員，你需要靠住佢地去贏下比賽或以獨有嘅方式作賽。我唔知教練會否願意有一個咁大嘅改變，因為佢嘅回歸代表球隊將因應佢嘅要求而完全改變。」

作為球迷，相信唔少人都想再見到伊巴謙莫域出現喺世界盃當中，但如果為到瑞典隊嘅前景黎講，保持原有班底及戰術可能先有機會令球隊走得更遠。