【世錦賽逆轉】「火箭」生涯打出946次Century break！

文：MenClub 波特先生　　圖：互聯網
POSTED ON 23 Apr 2018


桌球世錦賽2018目前正喺英國舉行，其中世界排名第一衝冕嘅沙比喺首圈面對世界排名22位嘅Joe Perry竟然意外出局，令唔少人大跌眼鏡。而喺沙比落馬之後，賽事嘅奪標大熱門就落到「火箭」奧蘇雲利身上。不過，呢位世界排名第二嘅傳奇球手喺首圈亦都差啲爆冷被擊敗。

世錦賽首圈，「火箭」嘅對手係世界排名第18位嘅Stephen Maguire，後者世界排名最高曾上過第2位，所以實力亦都絕對唔弱。而比賽一開始，「火箭」明顯未入狀態，局數竟然被對手一下子連拎4局，以0:4落後，由於賽事係19局10勝，所以可以話「火箭」一黎已經輸左接近一半。

不過「火箭」始於係「火箭」，只要佢進入狀態佢仍然係世界最出色嘅桌球手，佢之後喺第6局及第7局連續打出Century break，亦即係單桿打出超過100度，好快佢就成功逆轉對手，並以總局數10:7淘汰對手，晉身次圈，而次圈佢嘅對手係世界排名第15位嘅Ali Carter。


今次「火箭」晉級過程都可以話相當驚險，要知道佢生涯較少可以打出咁大距離嘅逆轉，而第6及第7局嘅Century break，亦令佢生涯打出嘅Century break次數增加至946次，繼續不斷刷新歷史Century break次數紀錄。要知道桌球歷史上，「火箭」係唯一一位生涯曾打出900次或以上Century break嘅球手，而排名歷史第2嘅「桌球皇帝」亨特利亦都只係打出過775次Century break，所以可想而知「火箭」究竟有幾變態。

預計未來「火箭」將可以繼續進一步鞏固自嘅歷史紀錄，而喺世錦賽無左沙比呢位最大對手後，「火箭」擁有絕佳機會奪得今季第6個排名賽冠軍！