【無敵】「泥地王」拿度成泥地場上的獨孤求敗！

文：MenClub 波特先生　　圖：互聯網
POSTED ON 23 Apr 2018

2017年同費達拿平分秋色各自拎到兩個大滿貫冠軍嘅「泥地王」拿度，喺進入2018年後因為傷患困擾導致佢年頭表現未如理想。不過經過一輪休養及調整後，世界一哥拿度終於喺自己強項嘅蒙地卡羅大師賽呢個泥地賽正式復出！

雖然拿度已經31歲，作為運動員黎講佢已經唔再年輕，體能及運動能力照常理黎講都開始要走下坡，不過同一時間其經驗及個人技術則不斷提升，對比賽嘅掌控亦唔係年輕球員能夠相提並論的。

作為法網前用黎調整狀態嘅賽事，拿度喺蒙地卡羅賽打出統治性嘅實力，佢喺決賽上以6:3及6:2直落兩盤輕取日本球手錦織，生涯第11次奪得呢項賽事嘅冠軍。另外，喺今次奪冠之路入面，拿度可以不失一盤，並且總計只係失左21局，說明只要佢處於正常狀態，佢仍然喺泥地場上無敵嘅存在。

生涯至今，拿度喺泥地賽上嘅戰續為395勝35負，勝率高達91.9％，排名歷史第一。其中佢喺過去13年成功10次奪得法網，係四大滿貫單項賽事入面嘅歷史之最，當中包括一次4連冠及一次5連冠。

由於泥地場擊出嘅球彈跳速度較慢，並彈跳得較高，所以球員會有較多時間去追個波，擅長跑動及底線擊球嘅球員就較為適合打泥地賽，而拿度正正就係擁有極強嘅跑動能力，識得利用泥地賽獨有嘅滑步去追球，同時佢底線嘅上旋擊球打法亦令對手喺泥地賽較難應對，所以造就拿度呢位泥地賽上嘅獨孤求敗。

以拿度嘅表現黎睇，只要佢能夠保持健康，佢絕對可以喺法網繼續統治多幾年，屆時費達拿應該已經退左休，所以到時拿度隨時可以超越「瑞士天王」成為網壇奪得最多大滿貫嘅球手呢！