和月伸宏回歸！《浪客劍心「北海道篇」》恢復連載

文：米　　圖：互聯網
POSTED ON 27 Apr 2018

《浪客劍心》作者和月伸宏喺上年9月先為《浪客劍心》嘅完結接力，開展《浪客劍心「北海道篇」》嘅連載，點知連載咗僅僅三話，就喺2017年11月21日，因為持有過百張兒童免情DVD及CD，以「涉嫌收藏兒童色情物品」而被東京警方調查。雖然呢項罪名最高刑罰只係監禁一年或者罰款100萬日元，睇落唔算非常嚴重，但已經足以毀壞和月伸宏嘅名聲！本來以為讀者呢世都睇唔到《浪客劍心「北海道篇」》嘅後續，但估唔到事隔半年左右，就傳出和月伸宏回歸嘅消息，仲話會恢復《浪客劍心「北海道篇」》嘅連載，和月伸宏今次認真好彩！

其實呢單Case喺今年2月27日已經有裁判出爐，和月伸宏最後以繳納20萬日元罰金甩身，雖然冇惹罪上身，但喺道德觀念極重嘅日本，收收埋埋咁多兒童色情物品仲可以翻身出嚟繼續畫畫，真係有啲估佢唔到。Any肥，集英社近日喺官方正式宣布，《浪客劍心「北海道篇」》將於《Jump SQ》7月號恢復連載，對粉絲而言，都係件開心事嚟嘅。