【團結】騎士全隊著同一套西裝將再次改變NBA形象？

文：MenClub 波特先生　　圖：互聯網
POSTED ON 26 Apr 2018

NBA作為北美四大運動，亦係世界最受關注嘅運動聯賽之一，佢地打造嘅形象必須大方得體，同時兼具要有令人覺得專業嘅感覺。而就喺騎士隊日前全隊著住同一套西裝進入比賽場地，NBA可能會再一次迎來有關形象上嘅重大轉變！

2004-05球季前，NBA球員都可以隨心所欲鍾意著咩衫現身人前都無問題，因此大家可以見到「戰神」Allen Iverson、Carmelo Anthony等球星們著住鬆身衫，完美展現當時美國嘅hip hop文化。不過自從2004-05球季後，NBA正式推出著裝令，所有球員禁止喺比賽期間著起短袖衫、短褲及配戴頸鏈或髮飾，基本上球員都需要著西裝出現人前。

著裝令呢項規則雖然起初引起唔少反對聲音，不過至今已經成為NBA一種專業形象嘅表達，所有球員都已經乖乖咁執行。雖然係咁，目前嘅規則入面只係需要球員們著西裝，亦即係無規定咩款式，所以理論上唔同球員都會著唔同嘅西裝出現喺球場。

而就喺岩岩騎士與溜馬嘅季後賽第四戰對決，騎士全隊突然著起全套一式一樣嘅西裝出現，令唔少人眼前一亮，亦對呢件事非常關注。原來，今次騎士全隊著住相同嘅西裝出現比賽場地，係LeBron James特意為全隊度身訂造的，而且呢啲西裝更加係出自著名設計師Thom Browne之手，每一套都非常昂貴。

對於全隊著起一式一樣嘅西裝，有唔少人覺得好搞笑，認為佢地似一班男模兒。不過，其實著住同一套衫令人覺得，佢地由比賽前已經係一支球隊，增加團結嘅感覺，特別騎士目前嘅處境並唔容易，隨時可能會被溜馬淘汰，所以佢地必須同心對抗強敵。

喺騎士展現出全隊著起一樣嘅西裝後，未來NBA各支球隊可能都會仿效，新一輪嘅熱潮可能就此展開！而值得一提嘅起，呢個諗法其實係由LeBron嘅好兄弟Dwyane Wade想出來的，而LeBron只係將佢付諸行動個一位。