【MVP不死】Derrick rose絕對唔只老將底薪合同吧！

文：MenClub 波特先生　　圖：互聯網
POSTED ON 26 Apr 2018

火箭vs木狼嘅季後賽首圈系列賽，喺火箭有6位球員得分上雙下正式結束，呢支西岸一號種子以總局數4:1淘汰八號種子木狼，將會喺次圈面對雷霆或爵士嘅勝方。而落敗嘅木狼球員就提早放暑假，管理層就要認真諗下究竟來季陣容上會否需要作出變動。

睇番今個系列賽，木狼領軍人物Jimmy Butler其實表現尚算不俗，佢喺防守端有最大程度上限制對方核心James Harden，但在進攻端卻不夠穩定，特別在生死戰第五戰中，竟然只係拎到8分，呢個係令人難以接受的。

木狼另外兩位年輕核心Karl-Anthony Towns及Andrew Wiggins，前者在頭三場完全處於迷失狀態，其中頭兩場加埋先拎到13分，而第三戰雖然拎到18分，但命中率只有38.5%，明顯完全不在狀態。而Wiggins雖然喺得分上較為穩定，但最後兩場嘅命中率卻只有35.7%，作為球隊嘅得分主力完全係令人失望的。

就喺三位核心都打唔出應有水平嘅時候，木狼卻有一人挺身而出成為球隊最後一根救命稻草，無錯佢就係前MVP Derrick Rose。作為NBA歷史上最年輕嘅MVP，Rose因膝傷已經再唔係昔日個位無堅不摧嘅「飆風玫瑰」，但係如今嘅佢卻比任何人都更珍惜在場上嘅每一分每一秒，因為佢唔知道自己咩時候會再打唔到球。從比賽中可以睇到，Rose並唔會輕易放棄任何機會，其他隊友唔郁佢自己點都會郁，就算明知會犯規都會盡力阻止對手。

喺今個系列賽，Rose五場比賽全部以後備身份上陣，平均獲得23.6分鐘上陣時間嘅佢，可以拎到14.2分2.6助攻，唔好睇佢嘅數據看似平平，佢已經係隊內第4嘅得分手，就算相比隊內得分最高嘅Butler都只係相差1.6分，但Rose嘅上陣時間要比Butler少10.4分鐘咁多。

再細睇Rose今個系列賽嘅數據，五場比賽落黎佢嘅投射命中率平均達到50.9％，而以往一直為人垢病嘅三分球命中率更高達70％，罰球命中率85.7%，呢三項數據都要比木狼三大核心要好上唔少，所以今個系列賽木狼表現最好嘅球員就係Rose！

輸比火箭後，木狼今個賽季亦正式完結，而Rose嘅合同亦會喺今夏到期，呢位前MVP非常希望來季可以重返木狼，佢唔認為自己嘅球員生涯就此完結。木狼會唔會再簽佢呢就係未知之數，不過睇番佢今個系列賽嘅表現，佢絕對值得一份只至老將底薪的合同吧！