今日季後賽東岸次圈塞爾特人與76人黎到第5戰，上場成功扳回一場嘅76人避免被橫掃嘅尷尬局面，甚至佢地嘅主將「大帝」Joel Embiid更揚言想完成不可能的逆轉。而今仗76人喺尾段的確曾領先塞軍，一度見到二連勝嘅機會。不過，始終塞軍有住年輕嘅「軍神」Brad Stevens，所以往往喺最尾決勝負嘅時刻，把握到機會嘅總會係塞軍。所以，最終塞爾特人以114:112險勝76人，以總局數4:1打入東岸決賽。

如果只係睇總局數4:1的話，你可能會覺得兩支球隊實力上應該都差好遠，不過其實你有睇比賽嘅話，雙方實力都相當接近，甚至各有長處，但方向卻各走極端。而分析呢兩隊嘅情況，卻可能可以令NBA其他球隊作為參考，因為你可以見到究竟組軍實際需要啲咩。

團隊、戰術

先睇成功晉級嘅塞爾特人，佢地喺季後賽缺少兩大核心Kyrie Irving及Gordon Hayward，理論上實力大打折扣，但實際上佢地憑住團隊合作令球隊實力變成1+1>2，各個球員喺球場上嘅工作分明，亦無一位係絕對嘅球隊明星，所以大家先見到塞爾特人經常多點開花，令76人難以進行針對性嘅防守。

當然，塞軍並唔係無天賦，好似Jayson Tatum、Jaylen Brown等，都係已經展現出實力嘅年輕球員，不過球隊一路走來更多靠嘅並唔係佢地嘅個人天賦，而係對戰術嘅執行力。無錯，塞爾特人最成功嘅地方就係背後有一位超強嘅年輕教練Stevens，而一班球員亦願意拼盡執行就係如今塞軍強大的原因。

Stevens雖然只有41歲，但係已經獲得外界一致肯定，而佢背後擁有嘅戰術可以話多得驚人，而喺比賽中亦已經多次展現出黎，獲得極好嘅效果，其中好似面對76人嘅系列賽已經證明呢一點。

個人、天賦

如果話76人係現今最具天賦嘅球隊，相信無咩人會反對，佢地坐擁2016年狀元Ben Simmons、「大帝」Joel Embiid及2017年狀元Markelle Fultz三位天才球員，另外再配備兩大射手J.J. Redick及Marco Belinelli，仲有好使好用嘅Dario Saric，76人嘅陣容真係非常好睇。

不過，擁有呢套陣容嘅76人更多係由Simmons自由策動進攻，並由Embiid喺內線發難，雖然Simmons實力強大，但係今季始終係佢第一年打NBA，經驗上點都唔夠，所以可以見到佢喺季後賽嘅失誤次數達到4.4次，足足比常規賽多左1次。

單睇比賽期間，76人同塞爾特人其實都係非常接近，但每對關鍵時刻，76人就會出現更多失誤，呢一點就睇到教練實力嘅分野。76人主教練Brett Brown曾喺馬刺主教練Gregg Popovich手下做助教多達11年，理論上應該學到唔少野。不過實際出到黎，睇到佢喺季後賽嘅表現確實令人有啲失望，特別係對手嘅Stevens實在出色太多。

今次出局，可以令76人呢班擁有極高天賦嘅怪物上到重要嘅一課，如果今夏佢地可以將呢份出局嘅失落感轉化為動力去做更多訓練，甚至同教練有更多溝通及加強球隊嘅執行力，咁樣呢支76人相信未來一定可以走得更遠，成就一定唔會低！