昨晚歐霸盃決賽「雙馬大戰」，喺5萬5千多名球迷嘅見證下，馬體會憑住狀態大勇嘅基沙文梅開二度，再加上基比嘅入球，以3:0完勝馬賽，繼2012年後再一次捧起呢項賽事嘅冠軍獎盃。

就喺馬體會奪冠高興嘅同時，其實當中卻夾離著一些傷感，因為佢地有一位球員即將離隊，佢就喺「王子」費蘭度托利斯(Fernando Torres)，呢位球隊嘅傳奇前鋒即將第二次離開球隊。

馬體會一向「神鋒」輩出，阿古路、科蘭、法卡奧、迪亞高哥斯達、基沙文都係呢支球隊當中打出名堂，而托利斯則更加係馬體會隊史最佳射手之一，受盡球迷歡迎。不過，球員始終有離開球隊嘅一日，而呢位34歲嘅球隊青訓將會喺今夏再一次離隊。

作為馬體會嘅青訓產品，費托1995年就加入球隊開始進行訓練，直至1999年以15歲之齡正式與球隊簽下職業合同，及後喺2000-01球季正式為一隊上陣。

由2000-01年球季起，費托一直為馬體會踢至2006-07球季，期間佢一共為球隊上陣244場攻入91球。2007年夏天，費托以破利物浦轉會費紀錄加盟呢支英超球隊，首季佢就已經踢出身價，個人全季攻入33球，成為當時世界最炙手可熱嘅神鋒之一。

雖然回歸馬體會後，費托已經唔能夠再交出當年嘅表現，但係一眾球迷仍然非常愛戴呢位球會傳奇。如今費托即將再一次離開球隊，雖然呢個現實難以避免嘅情況，但係相信一眾馬體會球迷仍然非常感謝呢位射手，及永遠懷念佢當日嘅貢獻。

托利斯馬體會數據及榮譽：

上陣次數：403場(隊史第7位)

入球數：127球(隊史第5位)

西乙冠軍：2001-02球季

歐霸盃冠軍：2017-18球季

費托歐霸盃賽後訪問：