【入廠啦】艾馬利正式接替雲加成為新任廠長！

文：MenClub 波特先生　　圖：互聯網
POSTED ON 23 May 2018


對於唔少阿仙奴球迷黎講，執教球隊多年嘅領隊「雲爺爺」雲加終於宣佈離任，可以話係球隊一個向前踏出一步嘅喜事。不過，接下來究竟由邊一位領隊執教球隊則成為球迷最關注嘅事，最終今日阿仙奴官方正式宣佈，由岩岩一季執教巴黎聖日耳門領隊艾馬利正式接任雲加，成為新一任廠長！

今次加入阿仙奴，消息指玩年46歲嘅艾馬利同球隊簽約4年，年薪為600萬鎊。而上兩季艾馬利都喺法甲執教巴黎聖日耳門，並為球隊今季重奪法甲冠軍，同時亦都帶領球隊囊括過去兩季嘅法國盃、法聯盃及法超盃，可以話助球隊喺國內接近無人能敵。

不過，雖然球隊實力強大，但去年夏天引入尼馬之後，艾馬利明顯無法控制到更衣室嘅情況，而尼馬嘅權力甚至被認為超過左領隊艾馬利，所以令艾馬利覺得難以再留隊執教。

而此前曾經有指阿仙奴銳意讓前球員阿迪達接任雲加成為阿仙奴新主帥，但最終還是選擇左艾馬利。其實選擇艾馬利亦絕對合理，因為佢由2004年起從球員轉為教練，至今已經執教14個年頭，其間亦曾奪得過不少錦標。

艾馬利成為教練後，曾分別執教過拉科魯尼亞、阿美尼亞、華倫西亞、莫斯科斯巴達、西維爾及巴黎聖日耳門，所以阿仙奴係佢第7支執教嘅球隊。而要數艾馬利執教期間最出色嘅階段，除左過去兩年執教聖日耳門之外，就要數執教西維爾嘅三年間，佢連續三年助球隊奪得歐霸盃冠軍。