2018俄羅斯世界盃仲有半個月就正式展開，大部份球隊已經相繼公佈最後征戰嘅23人名單，而日前終於輪到亞洲勁旅日本，其中多位為人所認識嘅球星，好似本田圭佑、香川真司及岡崎慎司亦都相繼入選，唔知今屆佢地又可唔可以踢出令人驚喜嘅表現呢？！

以下為世界盃日本23人最後名單：

門將：川島永嗣（梅斯）、東口順昭（大阪飛腳）、中村航輔（柏雷素爾）

後衛：遠藤航（浦和紅鑽）、昌子源（鹿島鹿角）、植田直通（鹿島鹿角）、吉田麻也（修咸頓）、野智章（浦和紅鑽）、長友佑都（加拉塔沙雷）、酒井宏樹（馬賽）、酒井高德（漢堡）

中場：長谷部誠（法蘭克福）、山口螢（大阪櫻花）、本田圭佑（帕丘卡）、香川真司（多蒙特）、乾貴士（伊巴）、宇佐美貴史（杜塞爾多夫）、原口元氣（杜塞爾多夫）、大島僚太（川崎前鋒）、柴崎嶽（基達菲）

前鋒：岡崎慎司（李斯特城）、大迫勇也（雲達不萊梅）、武藤嘉紀（緬恩斯）

睇到以上23人名單，你會發現好似淺野拓磨、井手口陽介、三竿健鬥、青山敏弘等較為球迷熟悉嘅球員都落選了。

再睇番今次最終名單中，有14位球員黎自海外，而球員平均年齡超過29歲，亦即係話球隊經驗較為豐富，但活力可能就略嫌不足。

不過喺外圍賽最後12強期間，日本則表現出色，雖然分到同澳洲、沙特同一組，但佢地仍以6勝2和2負，入17球失7球下，成為小組首名，從而獲得決賽週資格。

而喺決賽週，日本隊被分至與哥倫比亞、塞內加爾及波蘭同組，小組整體實力不算太強，好大機會成為8組當中最混亂嘅一組，同時亦都代表上屆小組包尾出局嘅日本係有機會殺入16強的。