加盟左巴塞隆拿半季嘅巴西中前場球員古天奴日前表示，沙拿及尼馬將成為今夏俄羅斯世界盃嘅最佳球員！唔知你又點睇呢？

世界盃將會喺大慨一個多星期後正式展開，而沙拿及尼馬都好大機會帶傷上陣，其中沙拿嘅傷情較為嚴重，因為佢喺岩岩嘅歐聯決賽中被皇馬中堅沙治奧拉莫斯拉低整傷左肩，相信將難以喺世盃展開時100％康復。另一邊廂嘅尼馬，則自從2月因腳傷已經休養左3個多月，不過喺岩岩嘅一場巴西vs克羅地亞嘅熱身賽中終於復出，並以出色嘅表現換黎一個入球。雖然復出即入球，但係尼馬表示自己目前狀態只有8成，所以可以期待黎緊嘅世界盃睇下佢可唔可以回復100％。

ICYMI, looks like @neymarjr is back right on time pic.twitter.com/Zs8YN9oZ05

— FIFA World Cup  (@FIFAWorldCup) 2018年6月3日

古天奴效力利物浦期間，曾與沙拿合作過一段短時間，而同時佢亦喺巴西國家隊中與尼馬合作無間，所以相信佢對二人都非常了解。呢位巴塞球員認為，沙拿及尼馬將會喺世界盃呢個舞台達到自己生涯嘅最巔峰。

古天奴認為，美斯及C朗二人已經統治左球壇好多年，佢相信現在喺時候有其他球員能夠成為世界最佳球員，同時呢位球員將好大機會成為世界盃嘅最佳球員。而古天奴就認為:「沙拿及尼馬將有最大機會，當然屆時都需要取決於比賽情況，但佢地有能力做到，佢地係我睇好嘅球員。」

如果照古天尼咁講，其中尼馬要想成為世界盃最佳球員，絕對需要佢本人嘅幫助，因為佢將會係尼馬前線其中一位好幫手，如果古天奴打唔出表現，相信尼馬及巴西亦都會大受影響。另外，沙拿如果能夠克服傷患，相信佢嘅個人能力仍然備受看好，但係由於埃及實力未見突出，所以沙拿要想殺入16強都唔係易事。

而睇番美斯同C朗，美斯雖然技術上仍然係世界第一，但係阿根角整體實力並唔算特別好，特別係後防令人擔心，所以美斯能否帶領阿根廷再次打入決賽將非常困難。而葡萄牙除左2016年歐國盃成功奪冠之外，過去喺世界盃都未有非常出色嘅表現，再加上C朗年紀已大，陣容實力未算強大，所以要打出令人驚喜嘅表現相對困難。