今年NBA總決賽，騎士已經0:2落後比勇士，而Game1當中JR Smith一次驚人嘅舉動抹殺騎士絕殺勇士嘅機會，從而成為唔少球迷茶餘飯後嘅話題，JR因此過去一整個星期都持續被嘲笑，甚至喺Game2中被勇士球迷高呼「MVP」，實在係情何以堪到極點。

最頂癮嘅係，JR喺Game1賽後接受訪問時竟然話自己原來知道當時雙方係打成平手，佢咁樣講就更加令人唔明白當時究竟佢諗緊乜，點解搶到籃板後要跑出三分線。

而事件經過一個星期嘅發酵後，JR已經被全世界笑到盡，但係日前佢再接受訪問時又有驚人嘅發言。JR：「我從來都係球迷們喜歡嘲笑及噴嘅對象，但我更喜歡而家咁樣，都好過無人認識我。」

睇見JR咁講都真係唔知好嬲定好笑，唔通呢啲就係叫做自嘲？

今年嘅季後賽，可以話係JR喺騎士四年當中表現最差嘅一次，命中率低至不足35%，三分球亦只有36.2%，場均得分只有8.4分，但要知道佢場均上陣時間卻達到32.4分鐘，係四年入面第二多的。而如果再細睇只係總決賽呢兩場，JR嘅表現就更加差啦，佢場均上陣35分鐘，場均只有7.5分，命中率低見26.3%，三分球命中率只有30%，要知道佢平均有多達9.5次出手，所以交比佢出手可以話基本上係浪費機會。

不過JR係「神經刀」就係人都知，當然佢再好似Game1咁失暈就神仙都難度，但係佢有機會突然搵番手感，咁樣騎士都仲有機會可以同勇士一博，否則都真係係咁先啦。