正所謂冤冤相報何時了？今夏將離開曼城嘅中場耶耶托尼同領隊哥迪奧拿勢成水火，並且已經撕破臉皮，因此近日爆出哥帥其實抱有種族歧視思想，所以先唔鍾意比作為黑人嘅托尼上陣。而最新嘅消息指，托尼經理人有意作進一步行動去報後哥帥，就係願意只收1英鎊週薪去加入英超前六嘅球隊！

今次1英鎊週薪加盟事宜，明顯係托尼經理人想向哥帥證明托尼仍然有能力踢頂級球會，甚至透過效力其他主要競爭對手去擊敗哥帥嘅曼城。效力曼城長達8季嘅托尼，自從哥帥執掌教鞭後就無太多好日子過，而上季佢全季就只有17次上陣機會，1個入球也未能夠取得，令托尼難以接受，所以決定離隊他投。

雖然離開曼城，但係托尼仍然好大機會留喺英超，甚至繼續留喺曼徹斯特市，因為曼聯可能會成為佢嘅新東家，要知道1英鎊週薪喺如今嘅足壇黎講簡直係聞所未聞，相信呢位中場勢必引起一番爭奪潮。

其實，托尼經理人方面曾透露有唔少外國球隊已經為托尼開出巨額合同，其中包括美職聯等，不過為左證明哥迪奧拿係錯，所以佢情願唔要錢都要留喺英超。

當然，除左1英鎊嘅週薪之外，托尼合同都會有其他附加獎金條款，但係佢都第一個目標都係好似上面咁講，就係要證明哥帥係錯誤的。而經理人亦揚言，如果普巴身邊有托尼，相信呢位法國中場將會學到唔少野，從而大幅提升表現。

不過事實上托尼已經35歲，佢已經再唔係以往個位中場全能球員，當然佢嘅經驗對於年輕球員有住非常大嘅幫住，但係實際比賽表現都係存疑的，只係1英鎊嘅週薪確實難以令一眾球隊拒絕呢！