尋晚世界盃H組最後一場分組賽：波蘭 vs 塞內加爾，波蘭作為第一檔次嘅球隊，賽前被睇高一線，相反塞內加爾陣中唔係有太多球員為人所認識，所以睇睇淡都合理的。不過，結果卻有啲令人意外，因為被睇低嘅塞內加爾卻以2:1擊敗波蘭，全取三分！

對於塞內加爾嘅勝利，最搶鏡嘅並唔係一眾球場上嘅球員或球證，而係企喺場邊嘅塞軍領隊Aliou Cisse！

對於呢位塞軍領隊你可能唔係太認識，不過如果你有睇呢場波，相信一定會比佢喺場邊嘅舉動所吸引，而值得一提嘅係其實42歲嘅佢以前都係球員，並曾經喺2002年世界盃代表首次參加世界盃嘅塞內加爾上陣比賽。

喺面對波蘭嘅比賽中，擁有一頭長辮子頭嘅領隊Cisse喺場邊不斷指手劃腳，而當球隊入波嘅時候佢更加有唔少動作，而佢面部表情亦都非常豐富，令人感到另一種熱血。另外，當佢督軍嘅時候亦會非常沉穩，甚至可以話非常有型咁企喺度。

作為球員嘅Cisse喺2009年退役，其後直至2012年開始正式開始教練之路，起初擔任嘅係塞內加爾U23嘅助理教練，然後喺2012年成為U23嘅正式教練，直到2015年更晉升為塞內加爾國家隊嘅主教練，今次首次帶隊參加世界盃即取得開門紅，實在令人感到驚喜！