今年NBA總決賽，勇士快打旋風輕鬆將騎士橫掃，連續第二年奪得總冠軍。而總決賽之後，NBA正式進入休賽期，但並唔代表無事發生，因為今日NBA就舉行一年一度嘅NBA選秀大會，各支球隊再一次有機會選上自己心儀嘅年輕球員！

作為手握狀元簽嘅球隊，太陽有機會可以透過呢位自己選上嘅狀元去加快重建步伐，要知道佢地已經擁有一位接近全明星水平嘅射手Devin Booker，如果再加上呢位新科狀元，相信太陽隊好快就唔再係一支魚腩球隊。

而最終，太陽選上黎自亞利桑拿大學嘅狀元大熱門DeAndre Ayton，基本上Ayton可以話係今屆狀元嘅不二之選。

DeAndre Ayton個人資料：

年齡：19歲

位置：中鋒/大前鋒

身高：7呎1吋(2.16米)

體重：118kg

模板：David Robinson / Shawn Kemp

Ayton被認為擁有征戰NBA嘅即戰力，其身型已經接近NBA球員嘅水平，再加上速度快，又識射三分，喺NCAA場均可以取得20.1分，可以話係一名攻守兼備多功能嘅超級內線球員。

當然，由大學進入NBA並唔容易適應，特別係對手嘅身型及力量完全唔係NCAA球員可以媲美的，所以Ayton好有可能好快就會碰上「新秀牆」，因為佢已經唔可以單靠力量或高度喺比賽入面為所欲為。

而帝王隊則拎住榜眼簽選上黎自杜克大學嘅Marvin Bagley III，以下係佢嘅個人資料：

年齡：19歲

位置：大前鋒

身高：6呎11吋(2.11米)

體重：107kg

模板：Chris Bosh / Julius Randle

Bagley擁有非常出色嘅運動能力，再加上擁有多種得分手段，又擁有合格以上嘅控球能力，因此預計佢會成為一名得分型內線球員。

不過，目前Bagley嘅身型在NBA中略嫌單薄，佢需要盡快增加自己嘅肌肉量，否則很難在NBA嘅內線生存下去。

探花方面，鷹隊意外地選上雖然被睇好，但就較為神秘黎自歐洲嘅球員Luka Doncic，但最終佢地選擇將佢交易至小牛，因此Doncic來季將會在小牛出道，以下係佢嘅個人資料：

年齡：19歲

位置：控衛 / 得分後衛

身高：6呎7吋(2.03米)

體重：103kg

模板：Manu Ginobili / Hedo Türkoğlu

同其他歐洲球員一樣，Doncic擁有一手出色嘅投籃技術及穩定性，再加上其廣闊嘅球場視野，相信佢進入NBA後將成為一名不俗嘅指揮官。

另外，Doncic今年帶領皇馬成為歐洲冠軍，同時佢自己亦成為聯賽MVP及四強賽MVP，說明佢已經係歐洲當中最出色嘅球員之一。

不過，同其他歐洲球員有相近嘅問題就係，其個人身體質素並唔算出眾，因此速度可能會成為佢嘅弱點，而同時身體對抗上亦較容易處於下風，如果搵唔到辦法解決佢將難以發揮自己應有嘅水準。