勇士喺岩岩嘅總決賽上以狂風掃落葉嘅資態4:0輕鬆擊敗騎士，近四年已經第三次奪得NBA總冠軍，可以話已經算係誕生一個王朝！

勇士陣中擁有四位全明星球員：Stephen Curry、Kevin Durant、Klay Thompson及Dryamond Green，當中兩人更加係當打之年嘅MVP，所以實力上絕對係傲視全NBA。而綜合黎睇，勇士唯一嘅弱點就只有中鋒位置，不過來季佢地可能連呢一個短板都有機會可以提升。

近日，黃蜂中鋒「魔獸」Dwight Howard成為自由身球員，雖然佢已經32歲，並且已經唔再係以往個位能夠同LeBron James單換個位「魔獸」，但係單論現役中鋒黎講，佢都仲係非常吸引嘅選擇，特別係上季佢喺黃蜂打出近年最佳表現，場均可以達到16.6分12.5籃板，所以喺自由市場中行情應該都會唔錯。

而為左繼續提升球隊實力，有消息指勇士有意簽下Howard，以提升球隊最弱一環，要知道如果勇士能夠獲得Howard，佢地對籃板球嘅控制將會變得更好，屆時Curry、KD等射手將更加毫無保留咁不斷出手，因為佢地知道Howard將更有效增加抓下籃板球嘅機會。

除左籃板球之外，Howard將可以提升勇士嘅防守能力，特別係籃底下嘅護框能力。上季Howard場均可以交出1.6次封阻，佢將可以大大減低KD嘅防守責任。

喺進攻端方面，Howard將可以增加勇士嘅進攻瓣數，特別係低位進攻，雖則佢嘅低位進攻仍然非常粗糙，但係還是可以為球隊帶黎唔少嘅得分，最重要係當一眾射手手感低迷嘅時候，Howard嘅角色將可以變得非常重要。

如果最終勇士真係成功得到Howard，咁樣呢支近年嘅三屆總冠軍將勢必變得更加恐佈，其他球隊要想擊敗佢地將變得更加困難，一支球隊獨大究竟會唔會破壞左NBA嘅觀賞性呢？NBA總裁Adam Silver又會唔會插手呢？