一邊廂各支球隊為出線搏盡，呢一邊廂G組已經督定出線嘅英格蘭及比利時將會喺最後一輪對上，爭逐首名出線。不過，有傳雙方都有意收起大部份主力，原因唔單止係為16強留力，更有消息指其實佢地都唔想首名出線，咁離奇？

睇番16強嘅對賽表，原來上線睇落去可以話非常嚴峻，因為當中分別有烏拉圭、葡萄牙、法國、阿根廷、巴西及墨西哥，其中前五支球隊都粒粒皆星，唔係話每一隊今屆都有好好嘅狀態，但係如果拎到G組首名嘅話就會落入同呢班勁旅爭逐出線。

相反，如果以G組次名出線的話，亦即係下線，當中分別有西班牙、俄羅斯、克羅地亞、丹麥、瑞典及瑞士，較為強嘅球隊就只有西班牙及克羅地亞，最後就算對手係H組首名，相信無論係英格蘭或比利時實力上都絕對佔優。正因為咁，所以兩支G組出線球隊都貌似想以次名出線，以避開一眾強隊，提升打入決賽嘅機會。

有消息指，比利時方面已經想撤下全部主力，派出10名後備球員，當然佢地嘅領隊就話讓受傷嘅球員可以獲得休息機會，同時亦都要避免讓有黃牌嘅球員上陣，以免有球員喺淘汰賽被停賽。

另一邊廂嘅英格蘭亦有差唔多嘅部署，佢地將會派出6名後備球員喺對比利時嘅比賽中上陣，而其中哈利簡尼暫時都應該會上陣，但絕對唔會上陣超過60分鐘，因為要為佢保留體力，同時佢都想比更多機會華迪等其他前鋒。另外，史達寧應該會被拉舒福特替換，而阿里亦都可能會取代連加特，比佢有更多機會尋回狀態。

本來呢場對決可能係呢個小組入面最精彩嘅一場，不過如今可能因為雙方都想走線嘅關係，球迷們可能睇唔到一場精彩嘅對決，甚至只係睇到一場唔願進攻、老鼠拉龜嘅比賽...