睇完琴日介紹過嘅《COD》新作，不得不驚嘆一下依家啲Game真係靚得太過份，但對好多老機迷黎講，始終都係當年啲老Game有味道啲。但有時就算想重溫往日舊情，你都唔知喺邊度先有得玩返，就好似初戀一樣，只能喺回憶中慢慢回味……

想搵返初戀，以下呢個名為The Internet Arcade嘅網站就幫到你。呢度收集咗由上世紀七十年代到九十年代頭所出，超過900隻街機任你玩。而且唔需要安裝任何嘢，只係需要一個Browser(連IE都得！），你就可以無限量重溫細個嘅時候屈喺士多打機嘅美好日子！

雖然唔知係咪隻隻都玩到，但就憑我隨機揀咗幾個黎玩，開到之餘亦都頗為暢順。而且用Browser都玩到就最適合返工蛇王用！

不過老老實實，呢堆Game面世嘅時候，本文青唔好講話識打機未，作為八十後嘅我根本就仲係我老豆體內嘅一條蛋白質，所以好多Game我真係見都未見過。有冇前輩介紹下有邊啲好玩啫？