勇士較早前喺總決賽以4:0擊敗騎士，過去4年已經三奪總冠軍，憑住年輕當打嘅超強陣容，佢地看似要開創一個屬於佢地嘅皇朝。而正當LeBron James日前宣佈加盟湖人，生涯首次轉戰西岸下，勇士今日亦都宣佈一個震撼彈，就係聯盟最佳中鋒之一嘅DeMarcus Cousins竟然以自由身加盟勇士！！！

勇士本來已經擁有四巨頭：Stephen Curry、Kevin Durant、Klay Thompson及Draymond Green，4位球員都係達到全明星級別，而當中兩位就更加係當打嘅MVP，陣容強度冠絕全聯盟，係唯獨中鋒可以話係佢地最明顯嘅弱點。不過，Cousins嘅加盟將令勇士表面上變得完美無缺，當各支球隊努力組成三巨頭嘅時候，勇士竟然不費吹灰之力組成可能係NBA歷史上最恐佈嘅五巨頭！

據消息指，上季效力鵜鶘嘅Cousins年薪達到1800萬美元，而由2010年累計至今佢已經賺到超過8000萬美元薪金。而今次加盟本身已經人才濟濟，薪酬總額已不多嘅勇士，Cousins當然要有所犧牲，就係佢只係可以獲得一份1年價值530萬美元嘅合同，作為聯盟最出色嘅中鋒之一，500多萬嘅年薪只係比佢新秀合同時期為多，所以勇士能夠簽得到佢真係超值都不得了。

上季，Cousins為鵜鶘上陣左48場，場均可以獲得25.2分12.9籃板5.4助攻1.6封阻1.6抄截，數據絕對係非常出色的，再加上佢上季三分球命中率達到35.4%，呢一點非常適合勇士嘅三分戰術。

而對於加盟勇士，Cousins並沒有任何感到尷尬，佢更認為自己落左一個「史上最聰明嘅決定」。確實，能夠加入而家嘅勇士，打波就會變得非常輕鬆，同時獲得總冠軍嘅機會亦都係大得令人難以置信的，所以如果未有總冠軍嘅球員，勇士絕對係一支非常吸引嘅球隊。

唔知岩岩轉戰西岸嘅LeBron，知道呢個消息後會有咩反應呢？