目前NBA正值休賽期間，所以球員們都各自各生活，而一部份則努力進行訓練，為新球季做準備。由於每位球員嘅訓練都唔同，所以大部份呢段時間球員們都係各自進行訓練，並且聯同其他球隊嘅球員進行特訓。

而日前，幾位年輕球員就約埋一齊搵著名嘅NBA訓練師進行特訓，佢地包括76人「大帝」Joel Embiid、塞爾特人嘅Jayson Tatum及NBA新秀歷史最長臂展嘅Mo Bamba。呢三位球員都算得上係新生代非常值得球迷留意嘅球員，其中Embiid更加已經達到全明星級夠，而Tatum亦喺上季證明左自己比自己年齡更成熟嘅球風，而Bamba則被寄望成為NBA新一代嘅籃框守護神。

喺呢次訓練當中，三位球員輪進行1對1嘅訓練，由於訓練並沒有任何特別嘅限制，所以三人都使出自己進攻絕活，務求擊敗眼前嘅對手。不過，可以留意到Tatum其實身高上處於嚴重劣勢，不過呢位小將卻利用自己嘅速度及靈活性分別喺Embiid及Bamba面前得分，實在令人大開眼界。

另外，Embiid嘅力量亦都係另外兩人難以對抗的，再加上佢亦都擁有出色嘅運球技術及速度，所以真係非常難防守。

Bamba雖然只係新秀，但擁有令人難以置信嘅臂展，Tatum面對呢位「巨靈神」都難以輕鬆喺籃底下得分，甚至佢亦曾嚐到Bamba封阻嘅滋味。

雖然只係短短嘅1對1進攻防守對練，但都可以睇到三人都非常落力，技術亦非常全面，相信唔使幾耐佢地幾位都會成為NBA嘅中流砥柱，甚至有力Embiid及Tatum更有潛力成為未來嘅第一人。