較早前，LeBron James正式與湖人簽下一份4年總價值1.53億美元嘅合同，平均年薪超過3800萬美元，對於33歲嘅LeBron James黎講呢份相信係佢生涯最後一份肥約，絕對值得慶祝一番！

正常球員能夠簽下一份天價合同，絕對會大肆慶祝一番，可能會同好友豪食，又或即時去買大屋買靚車，又或上社交媒體炫耀一下。不過，作為NBA第一人嘅LeBron James顯然唔係正常球員，因為佢係一名歷史級別嘅偉大球員，而佢亦向其他球員展示自己能夠成為偉大球員嘅原因。

就喺完成同湖人嘅天價簽約後，LeBron James隨即回到健身室進行訓練，佢用巨型槓鈴進行深蹲，又做唔同動作去鍛鍊自己嘅核心肌群，所以偉大真係唔係隨便可以得番黎，真係要付出非常多先有機會換番黎。

33歲嘅LeBron James上季為騎士上陣全部82場常規賽，平均可以取得27.5分9.1助攻8.6籃板，而進入季後賽佢就上陣左22場，平均取得34分9.1籃板9助攻，雖然總決賽被勇士4:0橫掃，但係LeBron已經傾盡全力，表現絕對對得起所有球迷。

新球季黎到湖人，雖然要挑戰勇士五條A難度看似極高，但係以LeBron嘅性格，佢絕對唔會投降，而係會繼續加強自己從而尋求機會擊敗對方！