尋晚，克羅地亞加時下半場成功憑住文素基治射入致勝球，以2:1反勝英格蘭，歷史性首度殺入世界盃決賽。晉身決賽，克羅地亞將會對住1998年冠軍得主法國，雙方踢法可以話非常唔同，兩隊都必定拎出拿出絕活去鬥過你死我活，所以呢賽決賽各位球迷絕對唔能夠錯過！

不過，今次克羅地亞殺入世界盃決賽令我地反思，呢個人口只有4百幾萬嘅國家，竟然可以培育出一隊技術咁出眾嘅球隊殺入世界盃決賽。如果再諗深一層，當日南斯拉夫如果無解體，究竟佢地會唔會有能力統治現今足壇？

如果有番咁上下資歷嘅球迷一定知道南斯拉夫呢個國家，雖然當年佢地未曾奪得過世界盃冠軍，但就人才輩出，世盃成績亦都唔錯。不過，喺90年代初南斯拉夫因為政治原因分裂，最終分裂出6個國家，其中包括斯洛文尼亞、克羅地亞、波斯尼亞、馬其頓、黑山及塞爾維亞。

試諗下，今日克羅地亞都可以殺入世界盃決賽，如果可以集結6個國家最出色嘅球員出戰世界盃，佢地又會係咩光景呢？單係以今日克羅地亞嘅陣容去添加另外5個國家嘅球員，呢對仲可以有咩球員可以入選呢？

波斯尼亞：迪斯高、比真歷

塞爾維亞：高拉洛夫、伊雲洛域、泰迪、馬迪

黑山：祖維迪

雖然唔算真係可以加入好多球員，但係都真係可以令如今嘅克羅地亞變得更加平衡及陣容深度更深，好似中場會有馬迪同比真歷分擔摩歷同拉傑迪嘅責任，而前鋒亦有迪斯高可以同文素基治拍檔，而高拉洛夫同伊雲洛域亦都可以增強兩閘嘅深度。如果真係可以有個咁嘅陣容，今屆世界盃仲唔係佢地嘅？