克羅地亞較早前喺世界盃四強擊敗英格蘭，歷史性首度殺入決賽。而呢支東歐球隊進入淘汰賽後16強、8強及4強場場都需要激戰120分鐘，其中兩場更加需要以互射12碼分勝負，可以想像克羅地亞班球員嘅體能消耗究竟有幾大！

相信有睇克羅地亞比賽嘅朋友，都一定睇到佢地呢班波個個球員都非常落力，就算好似對方喺後場搓波，文素基治等前線球員都會不惜跑動去迫搶對手。

而要數克羅地亞當中最勤力嘅球員，當然就係中場核心摩迪，其中好似佢面對俄羅斯加時尾段，竟然仲有力全力去追正飛出界嘅波，實在令人歎為觀止。而為左更具體呈現摩迪究竟有幾勤力，體能有幾恐佈，統計數字將可以幫到我地！

據國際足協FIFA嘅官方統計數字，摩迪今屆世界盃由第一場至今已經跑左39.1英里，亦即係63公里，呢個數字係今屆世界盃目前為止所有參賽球員當中最高的！

而喺三場小組賽加上16強、8強及4強，合計6場賽事入面，摩迪就只係喺分別面對冰島嘅下半場65分鐘及4強面對英格時加時118分鐘先被替換落場，亦即係話佢6場比賽合計上陣超過600分鐘，平均每9.6分鐘跑1公里。

正正就係摩迪嘅不倦跑動，令克羅地亞嘅防守120分鐘都唔會鬆懈落黎。黎緊決賽面對法國，克羅地亞需要挑戰自己嘅極限，因為相信佢地已經到達體能嘅上限，特別係摩迪。不過，當為嘅係世盃冠軍，相信摩迪就算踢到要死都一定會拎晒自己全部體能出黎，Chur爆法國！