全場比賽

年齡從來係運動員最大嘅敵人，就算你點訓練點保養身體都好，總會有一日身體機能下降而被迫退落黎。不過，當一名運動員能夠挑戰極限，甚至超越年齡限制嘅時候，呢個將會係一個偉大嘅時刻，而日前就有一名運動員成功超越界限，佢就係菲律賓拳王帕奎奧(Manny Pacquiao)。

日前，帕奎奧喺吉隆坡挑戰時任WBA次中量級35歲阿根廷拳王Lucas Matthysse，而由於唔少菲律賓拳迷專程去到現場支持帕奎奧，所以現場就猶如變成佢嘅主場一樣。雖然係咁，外界賽前都擔心39歲嘅帕奎奧無論係體力定係速度上都已大不如前，但比賽展開後卻令人意想唔到，因為帕奎奧竟然完全壓住Matthysse黎打，甚至喺早段嘅第三回合已經將對方擊倒在地。

之後嘅回合，帕奎奧都一直佔據主動，Matthysse雖然都有偶有反擊，但都難以比到對方好大威脅，最終喺第7回合被帕奎奧擊中頭部下跪低，裁判檢查並詢問後，Matthysse主動吐出牙膠表示放棄比賽，因此帕奎奧挑戰成功，以39歲之齡登上次中量級拳王寶座！

擊敗Matthsse後，帕奎奧生涯戰績提升至60勝7負2平手39次KO對手，同時亦都係佢9年以來第一次TKO擊敗對手，對上一次已經係2009年面對Miguel Cotto嘅比賽。

今次取勝，說明帕奎奧成功超越年齡界限，佢仍然係當今最出色嘅拳擊選手之一，佢嘅攻擊仍然係無堅不摧，威力驚人，同時佢亦都足以載入成為拳擊歷史入面最偉大嘅大嘅拳手之一。

其實，有唔少人都以為帕奎奧已經唔會再比賽，因為佢此前已經成為菲律賓軍隊成員之一，專門訓練士兵搏擊技術，再加上佢憑住出色嘅拳擊生涯坐擁1.5億鎊身家，又係5個小孩嘅父親，所以都唔太明白佢點解會再走出黎比賽。但係最終，帕奎奧以經驗及力量證明比全世界睇，佢仍然係世界冠軍，佢成功行出自己嘅路，贏得所有人嘅尊重！