《寵物小精靈》陪住唔少男士成長，到今時今日雖然大家都大個仔（除咗小智），但巴打們都keep住對《寵物小精靈》嘅情意結，特別係對萌爆嘅比卡超，更係充滿咗濃濃嘅愛，如果你都一樣深愛比卡超，嚟緊去日本就要留意下呢部「伊藤園X比卡超」販賣機，抽出限定比卡超模型喇！

其實上年伊藤園都有同比卡超合作，推出販賣機賣模型，見反應咁好，今年再嚟多次，而且仲係以夏日為主題嘅比卡超添！

今次嘅「伊藤園X比卡超」販賣機一共有10款限定版比卡超模型，每款玩具都用透明樽裝住，非常精緻，但買嘅時候你會唔知邊款打邊款，全部隨機抽出。

另外透明樽裡面除咗有比卡超模型之外，仲有一個徽章，同模型襯返一set。

目前一個樽賣800日元，巴打去日本時不妨留意下呢部「伊藤園X比卡超」販賣機啦！