而家睇西甲，基本上都係皇馬同巴塞之爭，最多加埋馬體會有機會左右大局。無他嘅，兩支班霸資源充足，可以盡收天下神兵利器，陣容深度又足，試問其他球隊點樣同佢地鬥。回想10幾年前，當年嘅西甲雖然皇馬巴塞都係強隊，但係仲有馬體會、華倫西亞、拉科魯尼亞等球隊可以同佢地一爭聯賽冠軍，而其中華倫西亞當年嘅陣容就更加令唔少球迷相當回味。

2001-02及2003-04球季，華倫西亞成功壓倒一眾強隊成為西甲聯賽嘅冠軍得主，而其中2003-04球季佢地更贏埋歐洲足協盃，成為雙冠王。

唔知各位有番咁上下資歷嘅球迷，仲記唔記得呢個時期嘅華倫西亞有咩球員呢？較為人熟悉嘅就包括以下呢幾位：

門將：簡尼沙利斯

後防：艾耶拉、馬真拿、大衛拿華路、柏歷堅奴、奧利里奧

中場：艾比達、巴拉查、維辛迪、艾馬、安古奴、基利干沙利斯、佐治盧比斯

前鋒：米斯達、祖安山齊士、卡維

相信大家一定好掛住上面呢班球員，就係佢地成功壓倒皇馬巴塞兩支班霸贏到兩次聯賽冠軍，而其中嘅艾馬就更加係美斯心目中唯一嘅偶像，甚至連馬勒當拿都曾經講過艾馬係唯一一個佢會比錢入場睇佢比賽嘅足球員，可想而知呢位中場當年究竟有幾咁強大及吸引。

基本上呢對華倫最強一定係條中場線，除左艾馬之外，艾比達同巴拉查係球隊攻防命脈，再加埋超級翼鋒維辛迪，令球隊嘅進攻變得更加立體。

後防方面艾耶拉同馬真拿係一對中堅好拍檔，佢地亦都減少左門將簡尼沙利斯唔少壓力。前鋒米斯達係球隊嘅主要得分手，雖然佢嘅能力唔算得上最頂級，但係總係可以為球隊帶黎作用。

睇番如今嘅華倫西亞，陣容上真係無乜幾多位為人認識嘅球員，實在令人唏噓。不過回憶總是美好的，以上呢套華倫陣容相信多年後仍然會為人津津樂道。