終於等到新一屆英超開鑼，而一眾強隊亦無令人失望，其中好似未以Full Team出戰嘅曼城就以2:0擊敗阿仙奴，曼聯揭幕戰上又以2:1擊敗李斯特城。不過，講到第一週表現最霸氣嘅球隊相信就一家係利物浦了！

2018-19球季第一週比賽，利物浦主場迎戰韋斯咸，派出強陣迎戰嘅利記由沙拿先拔頭籌，其後文尼又喺上半場吹雞前射空門入網，助紅軍帶住2:0步入更衣室。下半場，文尼喺有越位之嫌下轉身勁射將比數擴大至3:0。而喺比賽88分鐘，史杜列治憑住角球喺遠處近門射入，利記最終亦因此以4:0大勝對手。

呢場比賽利物浦可以話盡顯霸氣，全場控球率達到65％，射門12次，中龍高達8次，如果唔係對方門將法比安斯基多次救出險球，相信利物浦會有更多入球。不過呢場比賽都足以向其他19支英超球隊表示，佢地今季絕對係劍指聯賽冠軍。

而講到今場最開心嘅一位，就一定要數領隊高普，呢位明星領隊今仗非常肉緊，喺球隊入波後不斷瘋狂慶祝，其中一幕成個人好似「巴神」咁緊握雙拳，最後贏到4:0嘅時候佢好似終於放鬆開懷咁笑。

今年夏天，利物浦有唔少重要收購，其中門將位置以5600萬鎊從羅馬買黎巴西門將阿里遜，另外中場基達亦正式到位，仲有瑞士美斯沙基利及法賓奴，而其中阿里遜及基達已經即時成為球隊正選，而沙基利亦已經後備上陣，佢地嘅到黎令利記陣容變得更平衡及更有深度，面對長期嘅聯賽呢個絕對係優勢之一。

當然，利物浦最強嘅當然就係上季打到曉飛嘅進攻三叉戟：沙拿、法明奴及文尼，而今仗雖然法明奴未有入波，但係佢地三人就合力炮製左3個入球，表現持續強勁，亦都係今後一眾後衛嘅惡夢。

利物浦今季故然強勢，但係最大嘅敵人絕對係人強馬壯嘅曼城，雖然佢地今夏主要收購就只有馬列斯一人，但係佢地陣容深度本身已經足夠排出兩套強力陣容，所以球員嘅體力絕對可以靠住輪換得以支持到賽季結束，呢一點係利物浦難以相比的。所以，利物浦如果今季要想擊敗曼城贏下聯賽冠軍，咁佢地一定要確保自己盡量唔好喺弱旅身上失分，同時要留力令自己可以全力喺兩次面對曼城時盡力擊敗佢地，咁樣佢地就真係有機會挑戰冠軍了！