在台灣玉山舉行嘅2018年桌球世界公開賽決賽，「75三傑」嘅「金左手」馬克威廉斯繼奪得世界冠軍後，再一次打入排名賽決賽，對手係大衛基拔。

以為威廉斯應該可以輕鬆解決對方？咁你就錯啦，威廉斯基本上喺比賽大部份時間都處於下風，甚至喺比賽期間基拔曾領先局數9:5奪冠在望。可惜嘅係，喺重要關頭心理更勝一切，威廉斯憑住更穩定嘅發揮不斷從後進迫，最終成功扳成9:9平手。

喺最後一局，基拔本來握有主動權，但係一次長枱打紅波嘅時候誤算白球嘅移動路徑，最終比左機會威廉斯，呢位世界冠軍隨即把握今次機會，一路小心翼翼將比分追平並且成功反超前。雖然打到65:18嘅時候未能繼續得分，但係喺互set一cue之後，基拔又未能夠把握打入紅波嘅機會，最終威廉斯再打入一個紅牌，比賽亦喺基拔投降下完結。

今次決賽威廉斯可以話死過翻生，竟然喺絕境下成功逆轉奪冠，實在係非常精彩。而呢個冠軍，亦係威廉斯生涯第22個排名賽冠軍，係現役球員當中排名第3位(歷史第五)，僅次於33個排名賽冠軍嘅「火箭」奧蘇利雲及30個排名賽冠軍嘅希堅斯。

已經43歲嘅威廉斯同另外兩位75三傑一樣越老越可愛，去年至今狀態爆燈，去年一共贏得3個排名賽冠軍，加埋今次呢個世界公開賽冠軍，威廉斯喺最新嘅世界排名升上第二位，僅落後比沙比，而「火箭」則下跌一位至世界第三。