2018印尼雅加達亞運已經展開了好一段時間，香港嘅運動員亦相繼取得好成績，甚至獲得獎牌，相信一眾香港市民一定為此感到自豪。而較早前，「劍擊美女」江旻憓喺4強面對韓國選手康永美，僅以一劍之差落敗未能打入決賽，取得一面銅牌。

唔少人可能覺得近年嘅香港運動員就只有歐鎧淳較為出名，因為其外貌甜美形象健康，所以受到唔少廣告商青睞，並曾客串電影，甚至被提名最佳新演員。不過其實香港運動員仲有唔少出眾的，除左「跳高女神」楊文蔚之外，今次為港添得一面銅牌嘅江旻憓亦絕對值得留意。

現年24歲嘅江旻憓，曾兩度當選「香港傑出青少年運動員」，並喺2014年仁川亞運奪得兩面重劍銅牌、2017亞洲劍擊錦標賽中奪得一面銀牌，並喺今年首奪亞洲劍擊錦標賽嘅金牌，成績驕人。而除左運動方面表現出色之外，江旻憓喺學業方面亦非常突出，目前正喺美國史丹福大學就讀，真係可以話係文武雙全。

A post shared by Vivian Kong 江旻憓 (@vmwkong) on Jun 30, 2018 at 3:15am PDT

而今屆亞運雖然成功再添獎牌，但就未能突破自己最佳成績，對此江旻憓亦直言自己打得唔夠好，回去會繼續努力練習。

而較早前香港劍擊隊亦傳黎奪得獎牌嘅好消息，其中喺4強擊敗隊友張家朗嘅崔浩然，雖然決賽同樣以1劍不敵中國嘅黃夢愷，但就仍然成功為香港奪得一面銀牌。