亞運男子足球岩岩完成八強賽事，韓國隊喺面對勁旅烏茲別克，憑住加時下半場嘅12碼，成功以4:3戲劇性反勝對手，晉身四強。呢場比賽最開心嘅，相信除左韓國嘅球迷之外，就一定係熱刺嘅韓國球員孫興民。

相信唔少球迷都知道，孫興民願意放棄英超開季嘅比賽參加亞運，目的就係希望帶領韓國隊能夠奪得亞運金牌，從而令自己免除國家服兵役嘅硬性規定。不過，一路走落黎韓國隊表現唔算非常好，甚至差啲就喺八強被烏茲別克踢出局。

面對烏茲別克，韓國一度領先兩球，但下半場卻被對手反入2球，變成2:3落後，而幸好孫興民喺75分鐘成功助攻隊友扳成平手，將比賽帶入加時。喺加時入面，烏茲別克入球功臣阿利巴耶夫兩黃一紅被趕離場，韓國11打10獲得優勢。

去到加時末段，以為雙方可能進入互射12碼階段，烏茲別克球員竟然喺禁區入面犯天條拉低韓國球員，球證直指12碼，黃喜燦主射，呢個時候鏡頭捕追到孫興民嘅反應，佢竟然擰轉身掩住自己塊面唔敢望隊友射12碼，可想而知佢究竟有幾緊張。最終，隊友不負眾望成功得手，韓國絕殺烏茲別克晉身四強！

殺入四強，亦即係距離奪得金牌只有兩場比賽，孫興民究竟使唔使入伍就睇呢兩場比賽，要知道如今係孫興民嘅黃金時期，如果需要當兵嘅話就會嚴重影響其球員生涯，所以相信佢黎緊呢兩場比賽都會傾盡120%去爭取金牌！