俄羅斯世界盃前席，西班牙國家隊出現領隊風波，原來嘅領隊盧比迪古因被爆出會加盟皇馬，所以隨即被西班牙足總炒魷魚，並以希亞路作為臨時領隊，但結果西班牙喺世界盃表現未如理想，喺16強不敵主辦國俄羅斯提前出局。

世界盃結束後，西班牙足總決定聘請前巴塞隆拿教練兼西班牙名宿安歷基出任國家隊領隊，而近期正式入主嘅佢開始進行改革，近期佢就禁止球員喺食飯時使用手機，希望球員可以有更多交流。

不過，作為教練已經48歲嘅安歷基，有傳其實佢可以落場代表國家隊踢波，咁奇？係咪真呀？咁就當然係講笑啦，但原來日前一眾西班牙國腳接受體檢嘅同時，安歷基亦都有份進行檢查，而結果發現呢位教練嘅身體狀況極好！

負責進行呢次體檢嘅醫生更開玩笑咁講：「教練已經準備好落場比賽了！」

「如果比賽期間有一個較為艱難嘅情況，我認為教練係可以落場的，而預計佢將有唔錯嘅表現。」

最後，醫生認真表示西班牙國家隊嘅球員身體狀況都非常好，甚至可以話係無可挑剔的。

安歷基作為曾經嘅球員，喺2004年決定在巴塞隆拿退役，之後相隔4年後喺巴塞隆拿B隊開始教練生涯，其後先後執教過羅馬、切爾達、巴塞隆拿一隊及現在的西班牙國家隊。雖然已經退役左14年，但安歷基一直將身型Keep得好好，如今經體檢後進一步證實，佢嘅身體真係仍然保持喺最高水平，實在厲害！