國際足協(FIFA)年度頒獎禮即將舉行，其中最受關注嘅最佳男子球員最後三強為C朗拿度、摩迪及沙拿，5屆得主巴塞隆拿嘅美斯首次喺12年內第一次無緣進入三甲。

過去10年，美斯及C朗拿度平分秋色各奪5次FIFA最佳球員獎，但黎到今年「美C」壟斷嘅情況可能終於迎來終結，而呢個終結者將好大機會係克羅地亞中場摩迪。

有消息指，C朗拿度較早前已經宣佈將唔會出席FIFA頒獎獎，原因係要隨祖雲達斯準備比賽。呢個消息一出，已經令唔少人覺得C朗明知唔會拎到最佳球員獎，所以決定唔出席頒獎禮。而唔單只C朗，本來決定參加頒獎禮嘅美斯，今日亦宣佈因個人原因將會缺席頒獎禮。

美斯及C朗拿度同時缺席FIFA頒獎禮，係12年內首次出現嘅情況，對上一次唔見兩位已經2006年嘅事，當時FIFA嘅獎項仍然叫做「世界足球先生」，而當年嘅得獎者為簡拿華奴、施丹及朗拿甸奴。

預計今次美斯及C朗都缺席，都代表住將有一位新王登基，而呢位球員將有超過大半機會由摩迪奪得，呢位中場今年夏天助克羅地亞殺入世界盃決賽，雖然未能奪冠但一面銀牌已經令佢成為克羅地亞嘅英雄，除此之外佢上季亦助皇馬連續第三年奪得歐聯冠軍，表現出色。綜合兩條戰線，克羅地亞人奪獎亦絕對實至名歸。

不過，今次「美C」落馬，將會係一個時代嘅終結，今後兩人雖然可能仲有機會奪獎，但係好可能唔再係二人之爭，並好大機會進入一個群雄割據嘅時代。