《東京喰種》係日本漫畫家石田翠嘅青年漫畫作品，亦係日本近年好出名嘅動漫，內容大約係講食人怪物「喰種」喺人類世界生存嘅故事，而主角金木研佢原先只係一個普通人，後來一次意外受重傷，被移植「喰種」嘅器官，從此就變成「半人半喰種」嘅生物。

其實《東京喰種》之前已經推出過真人版電影，當時由窪田正孝演金木研、清水富美加演霧嶋董香、村井國夫演芳村功善、佐佐木希演入見佳耶、浜野謙太演古間圓兒、柳俊太郎演四方蓮示、相田翔子演笛口涼子、桜田ひより演笛口雛實以及蒼井優演神代利世，雖然大部分日本網民都激讚電影還原度極高，但香港網民又似乎唔係咁諗，唔知今次出《東京喰種2》真人版電影，又可唔可以令香港網民滿意呢？

官方最近就宣布，續作《東京喰種2》預定2019年會上映，演員方面將會同《東京喰種》時嘅陣容有別，《東京喰種2》真人版電影中，董香會換人，由山本舞香飾演，而變態美食家月山習就會由松田翔太飾演，希望快啲釋出預告畀粉絲過下癮先啦！