大阪環球影城一向都係關西旅行嘅重頭戲之一，又有「哈利波特主題樂園」，又有「Universal Cool Japan」，節目內容認真豐富，正所謂一分錢一分貨，USJ帶咗咁多歡樂畀大家，一班遊客都要識做（？）地畀返啲甜頭大阪環球影城嘅，所以嚟緊USJ決定又再加價，等你哋玩得開心之餘，佢哋又賺得開心。

目前大阪環球影城嘅成人票價係7900日元，雖然話就話嚟緊會加價，但就唔係日日都賣貴飛嘅，USJ會採用浮動價格政策，淡季就平啲，旺季就貴啲，例如1月係淡季，成人門票就會降價做7400日元；而2月至3月之間因為有春假，預計會係旺季，所以成人門票會漲成8200日元至8700日元。巴打們去玩時記得根據日期買飛，有時差一日可能價錢就唔同晒架喇！

另外大阪環球影城亦都公布咗2019年1月10日之後嘅價格調整，如果出年想去USJ嘅話，可以而家就睇定啲期同價錢先，心裡有個譜先都好丫。