Choro-Q遙控車仔　變形金剛任你砌

文：MenClub Patrick　　圖：MenClub
POSTED ON 25 Nov 2014

下年慶祝35周年嘅TAKARA Choro-Q車仔，睇怕冇乜大男人會玩，本來唔應該喺MenClub出現。但係，我相信任何年紀嘅男士都鍾意砌......玩具，所以嚟緊12出呢4款砌得嘅nanoblock Choro-Q，可能Gents都會有興趣。佢哋仲crossover埋《變形金剛》，又有得用手機遙控，一次滿足你三個願望呀！

四款車仔，兩款係普通甲蟲車同貨車（各¥3,800，約$250），嫌太普通可以不理，重點係柯柏文同大黃蜂兩款（各¥4,500，約$295）。佢哋唔止可以砌成車形，仲可以砌埋機械人，不過話時話，nanoblock咁細粒，你鍾意砌乜L都得啦。砌完車仔，喺手機下載番個專用app（iOS/Android），更能透過藍牙遙控佢哋四圍走，仲有埋引擎聲發出添。你估咁細架車仔行到幾耐？原來佢係用叉電，每叉一次就行到1分鐘，少就少啲，但總好過用餅電咁麻煩啦！