目前效力美職聯球隊洛杉磯銀河嘅瑞典前鋒伊巴謙莫域，有傳因為球隊已經無緣季後賽，所以已經進入休賽期狀態嘅佢非常得閒，可以襯呢段時間重返歐洲繼續比賽。而其中伊巴謙莫域曾經效力過嘅意甲球隊AC米蘭就有意再次簽入呢位射手，但係雙方現時因為合約期長短而處於膠著狀態。

據報導指，AC米蘭方面開出嘅合同長短為1年半，其中之後1年為球隊選項，亦即係6個月後米蘭可以選擇繼唔繼續留住「呂布」，而年薪則為150萬歐元。不過，伊巴謙莫域方面則希望合約係一份保障性的18個月合同，所以雙方陷入分歧。

除左回歸米蘭之外，曼聯亦都係希望得到伊巴謙莫域嘅球隊之一，其中曼聯領隊摩連奴同伊巴謙莫域嘅關係情同父子，所以重返奧脫福幫助摩佬亦唔係無可能。而眼見唔少球隊仍然對自己充滿興趣，呢位37歲射手再次揚言「全世界都希望得到我」。

雖然已經37歲，但係伊巴謙莫域確實仍然串得起，因為今季轉戰美職聯後佢已經喺27戰中攻入22球，並成為聯賽嘅MVP候選球員之一，只係球隊最終僅以1分之微無緣晉身季後賽。

AC米蘭如果最終真係再次可以得到伊巴謙莫域，相信對於佢地嘅陣容深度相當有幫助，一來伊巴謙莫域嘅身體狀態出色，入球能力仍然係世界級，佢將可以與希古恩為教練帶黎多種陣容選擇，而隊內嘅年輕射手並已經展現自己天賦嘅古頓尼亦都可以向呢位世界級射手學習，從而加快成長步伐。

如果伊巴謙莫域真係再次加盟米蘭，佢會唔會選擇喺呢個地方退役呢？